N’istituziun che se crüzia di jogn dla valada

Le Sorvisc ai Jogn dla Val Badia é n’istituziun fondamentala por l’aspet sozial tratan le svilup dles jones y di jogn dla Val Badia. Süa sënta prinzipala á le Sorvisc ai Jogn a Picolin, implü él gnü inaudé da püch le Zënter dla Jonëza “SaJ.un” a La Ila, olache al vëgn pité ativités desvalies por döta la jonëza dla valada. “Al dess ester n post d’incuntada y de formaziun por la jonëza y n aiüt por les families; la porta dess tres ester daverta por les ghiranzes y les nezescités de nosta jonëza”, spliga Carla Pedevilla, la responsabla dl Sorvisc por la jonëza dla Provinzia de Balsan. Tres i ofizi provinziai vëgn le laur dl Sorvisc ai Jogn finanzié dala man publica cun n contribut anual tl 2018 de 369.400 euro. “Vigni euro investí tla formaziun dla jonëza é n investimënt por nosc dagní y por ti dé poscibilités de tëmp lëde te nüsc paisc. Ma sce la jonëza resta söl post él poscibl da garantí che les comunités de valada restes inant tan plënes de vita”, insciö Pedevilla. Indöt á la Provinzia investí dl 2018 5,7 miliuns de euro por les organisaziuns joniles dla Provinzia, implü röiel ciamó lapró cater miliuns de euro por le renovamënt y la costruziun de infrastrotöres nöies por la jonëza. “Les organisaziuns joniles é de gran valüta por döta la sozieté, deache ares se crüzia de na buna formaziun dles generaziuns che vëgn docá”, spliga i assessurs competënc Daniel Alfreider y Philipp Achammer.

Le Sorvisc ai Jogn Val Badia é na istituziun che sostëgn les porsones, i grups, les uniuns, les assoziaziuns y istituziuns che se dá jö cun les mitans y i mituns y la jonëza dla Val Badia. Le fin prinzipal é chël da ti jí adincuntra a sü bojëgns y sües ghiranzes.  A ce dl Sorvisc ai Jogn él n consëi metü adöm da set mëmbri volontars dla valada. Ai sostëgn i cinch colaboradus te so laur da vigni de y tol les gran dezijiuns por proiec y manifestaziuns. Le consëi dl Sorvisc ai Jogn é gnü lité dl 2018 y é atif por trëi agn, cina tl 2021. Atualmënter é Valentin Erlacher le coordinadú dl Sorvisc ai Jogn. “Pro i compic dl Sorvisc ai Jogn alda l’acompagnamënt y le sostëgn di 44 grups mëmbri. Ara se trata chiló de uniuns y grups che se dá jö volontariamënter cun mituns y jogn dla valada”, spliga Erlacher. Implü röiel lapró le laur de volontariat che les uniuns y i grups fej de por de che é dër prezius y nia plü da ponsé demez. “Ai cheriëia n bun clima ti paisc y danter les porsones che porta a se sté saurí tla comunité. Na bona colaboraziun cun i mëmbri á porchël na gran importanza por le Sorvisc ai Jogn”, dij inant le coordinadú dl Sorvisc ai Jogn dla Val Badia.

Dlungia l’acompagnamënt di grups mëmbri, mët le Sorvisc ai Jogn ince a jí proiec y manifestaziuns por la jonëza dla valada. N proiet che vá fora por döt l’ann é le “Laur davert por la Jonëza”. Tratan les ores de daurida di locai di jogn y dles palestres ti paisc, ciafa i jogn y les jones la poscibilité da s’incunté y passé so tëmp lëde adöm cun compagns. Implü ti vëgnel pité de vigni sort de ativités, olache ai pó se devertí. Les educadësses ti dá te chësc proiet tröpa importanza al laur de prevenziun y de sostëgn dla jonëza. Tres l’acompagnamënt impara i jogn y les jones da ciafé na soluziun sce al é conflic y da costruí lians de confidënza. Ai vëgn incuntá cun l’azetanza de sües esperiënzes de vita, interesc, capazités y bojëgns. Tres l’acompagnamënt de jogn cun y zënza bojëgns particolars, vëgnel promoiü la toleranza y la desponibilité da daidé. An ne se conzentrëia nia sön i defizic di partezipanc mo sön so potenzial y sön les ressurses.

Por de plü informaziuns: www.jogn.org